Para sa Nakaimbento ng Banana-Q

at sa mga patuloy na nagluluto nito, mabuhay kayo.

kung sino man ang nakaimbento ng malinamnam at katakamtakam na merienda na kung tawagin ay banana-q, isa kang henyo. kung sino ka man, maraming salamat. dapat lang na ihelera ka sa mga kusinero na tanyag sa buong mundo at napapanuod ko sa cooking channel.

gamit lamang ang gamit na mantika, asukal na pula at saging na saba, nakagawa ka ng isang malinamnam na pagkain. gamit lamang ang tatlong sangkap, halo-halong lasa ang natitikman ng patay gutom kong dila. ang matigas na arnibal na tila mga palamuti na kumikinang-kinang na nakakapit sa saging na malaki at golden brown na mayuming nakatuhog sa finely carved stik ay talagang kaaya-aya sa mata. nakagagana, gawang henyo, walang duda.

ang lasa, oh ang lasa ay talaga namang katangi-tangi at hahanap-hanapin mo talaga. sa bawat kagat, sa bawat nguya ay mga magagarang ekspiryensya na dadalhin ka sa Italia, France, Greece at sa buwan. ang sarap at linamnam ng banana-q ay mahirap isalin sa salita. ang asukal na mala-kristal na nalalaglag sa bawat kagat ay hahabulin mo talaga na parang isang mamahaling diyamante na isusubo mo pa din kahit na lagpas na ng 10 seconds itong nakasayad sa sahig. ang saging na saba na may kakaibang tamis at lasa ay hihilingin mong hindi maubos dahil sa sobrang nakaaadik ang kanyang lasa. ibang klase talaga.

kung bibitayin na ko, banana-q at kape ang hihilingin kong huling hapunan. papayag din akong ito lang ang kainin hanggang sa katapusan ng Planeta. isusulong ko din sa kongreso na gawin itong Pambansang Merienda ng Pilipinas. gagawa din ako ng Party List para sa mga tindera ng sagradong merienda para maitaguyod ang pangangailangan nila at 'di magsawa sa pagluluto ng banana-q. at para sa nakaimbento nito, hahanapin ko siya at gagawan ng rebulto balang araw. mabuhay siya, mabuhay ang mga nagluluto ng paborito kong merienda.

sa halagang otso pesos, ang aking araw ay napupuno ng linamnam at sustansya. yeaba.