Ang Ganda ng Peklat Mo

nakamamangha, astig.

huwag mo nang kalikutin, hindi na lalabas ang tren. hindi na mahapdi, hindi na natutuklap. wag mong ikahiya.

may dahilan kung bakit ang sugat nagiging peklat. may dahilan kung bakit kahapon dumudugo yan at kumikirot, pero ngayon ay isa nang katangi-tanging peklat. maganda, madaming mukha. kahit hindi korteng ekis at hindi makinis, astig yan. madaming itinuro sa'yo yan.

hindi na masakit ang peklat. puwera na lang kung bubulatlatin mo. hindi na nakadarama ang peklat dahil natuto na 'to. alaaala na lang ng sugat ang peklat. alaala ng mga masalimuot na pakikipagsapalaran na magagamit mo para sa mas madugo mo pang kinabukasan. huwag naman sana pero, ano malay mo?

maganda ang peklat pero wag mo nang dagdagan. hayaan mong maging pananggalang mo ang maganda mong peklat para sa mga panibago pang sugat. gamitin mo ang peklat para maging paalala na masakit yung sugat na naging peklat na katunog pala ng eklat at kalat at balat na para ding peklat. tama, tingan mo lang ang maganda mong peklat. himasin, damhin, titigan at mahalin. tanggapin mo at wag kang magsisi. yakapin mo at pasalamatan. hawakan mo at wag kang magalit. kase dahil dun sa bagay o tao o pangyayari na sumugat sa'yo, nagkaroon ka ng magandang peklat na magiging kaagapay mo pag nakaapak ka ng eklat, nakakuha ng kalat, nakakita ng balat at ng kapwa mo din may peklat. mararamdaman mo na 'di ka nag-iisa. mararamdaman mo na suwerte ka pala dahil may peklat kang maganda.

huwag kang magalit sa peklat mo o dun sa sanhi ng peklat na yan. wag kang malumbay dahil may peklat ka dahil mas masakit kung hindi naging peklat yan. huwag mong taniman ng poot at galit ang peklat mo dahil hindi lupa yan, mukha lupa lang. magpasalamat ka sa peklat mo dahil ngayon, magaling ka na, niligtas ka niya, mas malakas ka na, astig ka na, dahil ang peklat mo, maganda.

kaya may peklat para mapalitan ang sugat ng nakaraan. kaya may peklat para maiwasan mo muli ang masaktan.