Nakikinig Ka Ba?

may naririnig ka ba?

nakikinig ka? ano pinakikinggan mo? binoboses mo ba yung pinakikinggan mo? binoboses yung narinig mo na masarap lang sa pandinig mo? binoboses ang mga bagay na sa tingin mo ay tama kahit hindi mo pinakikinggan yung iba. yung boses ng iba na hindi gusto ng iyong tenga. yung boses na magara at hindi mo inunawa. yung boses na hindi din pinakinggan ng iba kaya hindi mo na rin diringgin pa. bakit pa? may narinig ka na na masarap sa tenga. narinig mo na ang sarili mo. sapat na yun. masarap na yun. yun na ang tama. bakit pa makikinig sa iba.

ano naririnig mo? naglilinis ka ba ng tenga? paano mo pinakinggan? maingay ba o dahan-dahan?

ano ginagawa mo pagkatapos mong makinig? makikinig ka ba ulit o gusto mo ikaw naman ang pakinggan? paano mo tinitimbang ang mga bagay na sinasalo ng eardrums mo? agad mo bang binabato pagtapos mo pakinggan yung sarili mo? hindi ka ba nabibingi? naiingayan? siguro oo kaya wala ka nang pakikinggan. paano yung iba? hindi mo na pagbibigyan? paano mo sila mauunawaan kung hindi ka maglilinis ng tenga? kung tatakpan mo ito ng mga ingay na akala mo ay tama. ganyan ka ba makinig? paano ka matututo? sinubukan mo na bang pagsalitain yung iba at pakinggan din sila? o sama-sama na kayo ng mga kapareho mo ang tunog at hindi na pakikinggan pa yung ibang himig na mas maganda sana? yung ibang tunog para may matutunan ka pa. hindi na no? masarap na pakinggan ang sarili niyong halakhak. masaya na namnamin ang mga tunog ng lata na maingay, malakas, masaya pero walang laman. napakinggan mo na yung sa tingin mo ay mainam, sayang lang ang panahon kung pakikinggan mo pa yung ibang hindi mo sinubukang intindihin. ganyan ka ba makinig? ano naririnig mo?

pagtapos mong makinig, ano na gagawin mo? nagpaparinig ka ba? siyempre, gusto mo din na pakinggan ka. ano iparirinig mo? pakikinggan ka din kaya nila? paano ka pakikinggan? pinakinggan mo ba sila? ano gagawin mo? magpaparinig ka pa ba?

may narinig ka ba?