Ang Bangkerong Walang Layag at Sagwan

nagpapadala sa agos patungo sa walang hanggan.

malayaang umaagos ang banayad na alon pero hindi ang mga nakasalalay dito. malawak ang karagatan pero mas malawak ang mararating kung ito'y malalaktawan, malalakaran. kawawang bangkero, nakakulong sa isang malawak na paraiso -- maganda at masagana pero hindi niya kontrolado. isang matapang at marangal na bangkero. walang sagwan, isang lumang sombrero at pamingwit na yari sa kawayan lang ang tangan. sombrero na gamit niyang pananggalang sa umaalab na sinag ng kahapong nagdaan, dahil ang tahanan niya ay walang bubungan. hindi siya naiinitan. pamingwit na hindi niya ginagamit para makahuli ng isdang makakain, kundi para aliwin ang sarili, para makipaglaro sa mga munting nilalang na kanyang hinuhuli at pinakakawalan din 'pag napagod na ang mga ito, nagsawa na sa munti niyang barko. hindi siya nagugutom. matapang na bangkero, marangal na tao.

pagsapit ng gabi ay kakampi niya ang kalangitan. ang malawak na kalangitang tahanan ng kanyang mga kaibigan at balak puntahan balang araw. kasabay ng mga munting tilamsik na hatid nang nahimbing na karagatan, ay ang awitin ng mga balyenang naglalambingan. mga awiting dinadala siya sa kanyang tunay na destinasyon. mga himig na nagbibigay sa kanya ng magagarang sensasyon. kasabay ng mabilis ngunit dahan-dahang mga agos na tumatangay sa kanyang bangka.

ang kanyang bangka, ang matikas niyang bangka.

ang kanyang matatag na bangka na 'di kayang pataubin ng malamig at malakas na ihip ng hangin. ang munting bangka na nagsisilbi niyang paa. walang layag at sagwan, isang malayang tahanan para sa bangkerong kinulong ng mga alon ng tadhana. walang layag at sagwan, pero hindi lulubog, hindi puwedng tumaob. walang binabangga, walang inaabala. tahimik na naghahari sa karagatang puno ng hiwaga.

walang sagwan dahil wala itong saysay. hindi nito mahahati ang karagatan. walang layag dahil nakamamatay. mabilis siyang dadalhin nito sa hangganan ng paglalakbay.