Hangin, Mahangin, Umiihip

hingang malalim, mahal na hangin.

hikab. dahan-dahang tumatakas ang sigla na hawak ng kaluluwa. kailangan na yatang magpahinga ng ulirat. saan kaya mapupunta ang enerhiyang ibinuga? sasamahan siguro ang mga gunita, para madaming makita, para umandar, para matuto, para makatakas mula sa pagod na katawan. masarap humikab. masarap bumuga. masarap humikab at magpalipad ng kamalayan patungo sa kalangitang ikaw lang ang nakaaalam. hikab.

langhap. langhapin lahat, kasama ang mga dumi at baho na sa'yo ay nakapalibot. langhapin ang usok, poot, alikabok. langhapin ang aroma, ang ginisang bawang, ang lihim ni Victoria. lumanghap ng madaming bagay, madaming hangin. gisingin ang walang malay at paliparin ang takipsilim. lumanghap ng madaming hangin sabay takbo ng matulin. maraming salamat. langhap.

buntong hininga. mga munting panalangin na mahirap isalin sa salita. pag-ibig at kalungkutan na ibubuga sa iyong harapan. pansamantalang gagaan ang pakiramdam sa bawat hiningang pinakakawalan. pansamantalang makalalaya sa maitim na ulap na nananahan sa baga. mga munting hangin ng kalungkutan na dinadalangin na makapunta sa dapat kalagyan. maliliit at mabibigat na hangin na hindi napapansin, nakikita, nadarama. buntong hininga.

ihip. masasayang alaala. matatayog na lobo, bulaklak at mga bula. magagarang elisi na madaming ikot ang ginagawa. masasayang ihip na nakakikiliti sa kaluluwa. hipan, ang mainit na kape at masustansyang ulam. hipan, ang katawang nag-aagaw buhay at pusong nagdaramdam. umihip ng umihip at tangayin ang malungkot na nakaraan. masaya sa kalawakan. ihip.

maraming salamat Habagat, Amihan. maraming salamat hikab, langhap, buntong hininga, ihip. maraming salamat hangin.

puro hangin ang laman ng kokote ko, wala akong pakealam. niyayapos ako nito, tumatagos sa aking puso, buto at mga kalamnan. hangin lang ng hangin, malamig man o maligamgam. hahangin ng hahangin magpakailanman.

swooooosh.