Ang Sarap Ipukpok ng Tabo sa Bungo Mo

yung Orocan para masakit talaga.

hindi ko na itatanong kung gumagamit ka ba ng baso sa pagsisipilyo tulad ng turo saten nung nasa elementarya tayo. 'di ko na din itatanong kung yung kubeta niyo e may shower haytek na puwedeng labasan ng malamig o maligamgam na tubig. ito na lang ang itatanong ko: mababasag ba ang bungo mo 'pag pinukpok ko yan ng tabo na walang laman? walang laman. sayang kasi ang tubig kung lalagyan ko pa.

habang iniisip mo yan, isipin mo na din kung bakit kahit napapaligiran ng tubig ang Pilipinas e parang kulang pa din ang supply ng tubig dito. isipin kung bakit kahit tropical na bansa 'to, nawawalan pa din ng laman ang dam naten. isipin mo lang, wag mong dibdibin. baka mapatalon ka ng imburnal ng wala sa oras.

masakit ba mapukpok ng tabo? tingin mo? ano din sa tingin mo yung magarang kaganapan nung nakaraang taon? masakit din kaya yun? nung nagpakawala ng tubig sa mga dam kase umaapaw? andaming tubig noon. 'di nawawalan ng laman mga tabo noon. iba-iba pa kulay. may brown, itim at dilaw. ano? ipupukpok ko na ba yung tabo?

'pag ba pinukpok ka ng tabo, ano mararamdaman mo? nakaloloko yun 'no? andaming puwede ipukpok, tabo pa. pero mas nakaloloko ata 'to: yung mga bumberong magra-rasyon sana ng tubig, 'di nakapagrasyon kase rumesponde sa sunog. umuulan pa nun ah. dalawang sunog pa ata yun. ngayon mamili ka, pupukpukin ka ng tabo o masusunog ang bahay mo tapos walang tulo sa mga gripo kahit umuulan? dibdibin mo na lang para tumalon ka na lang sa imburnal. mahirap mamili e.

ewan ko. sa tingin ko, hindi na kelangang pukpukin ka pa ng tabo para mabiyak ang ulo mo. manuod ka lang ng balita, dudugo na kokote mo. ewan ko. kung baket yung mga bukid naten natitigang pero yung mga golf course e berdeng-berde at poging-pogi. hindi ko alam kung bakit yung mga car wash shops hindi nagsasara pero yung mga water refiling station, talo pa mga naluging intsik.

pukpukin na kita ng tabo a? tapos pukpukin mo din ako.