Purgatoryo

malungkot, nakatatakot.

bilyon-bilyong kaluluwa dito nakatambay. hindi kailan man maginhawa ang buhay. patag ang mga daan at ang mga nitso ay abot ang mga ulap. mga palahaw at hiyaw na naririnig ng mga tuod at kambing na may dalang tinidor. wala silang pakealam. puno pa siguro sa kalangitan kaya madami pang nakaabang dito? pero parang wala naman pinagkaiba sa impyerno? mainit din minsan pero madalas umuulan. pero parang ganun din naman. madami ang pinarurusahan.

mga humihingi ng hustisya at bida sa Magandang Gabi Bayan. mga delikwenteng nilalang na di alam kung saan yung tuwid at baluktot na daan. intayin nila si kuwan para malaman. sa madaling salita, isang malawak na espasyo para sa mga naliligaw na nilalang. humihinga kahit nakabaon na sa lupa at inuuod na ang katawan. hindi mainam na lugar para sa mga walang muwang.

pero salamat dahil may lugar na ganito. dahil dito, hindi ka agad nahuhusgahan, mabagal kasi ang kalakaran. puwede pang magbago. hindi pa huli ang lahat para maunawaan ang mga bagay na dapat matutunan. lugar kung saan mamumulat ang iyong mata. yung ikatlong mata. na kahit nakapikit ay dapat nakadarama. hindi nga ito ang pinakamainam na lugar pero dapat daanan at sana ay matakasan.

walang diskriminasyon, walang kahulugan. walang panlalait mula kaninoman. takot lang at madaming lungkot. pagkabagot at sankaterbang yamot. kahit manipis lang na linya ang nagsisilbing harang, mahirap pa din tawirin mula dito ang inaasam na kapayapaan. ang mga andito kasi, madalang mapansin. puwera na lang kung may miyembro ng media dito, blockbuster ang lugar na to malamang. siguro din, pag nagliyab ang mga tahanan, baka pati si Satanas maki-usyoso. kapag siguro nag-play dead sabay-sabay o anudin ng baha ang mga kaluluwa dito, baka mapilitan yung nagpapanggap na Diyos na lumitaw at maghimala. dahil dito sa purgatoryo, maraming himala pero walang naniniwala.

lugar di lang para sa mga bangkai, pati sa mga buhay na walang malay.