Paheram ng Sapatos

may pupuntahan lang ako.

hindi ko kasi nagagamit yung saken, kaya paheram ng sapatos mo. wala ako'ng ka-date, biyernes santo kaya. gusto ko lang maglakad at maglakbay at magtuklas. ibabalik ko din, hindi ko ga-gasgasan. paheram?

saan ka ba pupunta? saan ka pumunta? may i-papahiram ka ba o nang-hihiram ka lang din? bago din ba yung sapatos mo at puro alikabok? malungkot din ba yung sapatos mo? malungkot at bagot na bagot?

mang-hiram na lang tayo ng sapatos, samahan mo ako. at bigyan naten ng makukulay na paltos at galos yung mga talampakan natin. panahon ngayon upang maglakad at maglakbay at magtuklas. mang-hiram tayo ng sapatos na puro gasgas, may pudpod na suwelas, ma-himulmol na sintas at masarap ikaskas sa lupa.

pahiram ng sapatos, ayoko ng may takong. ayoko din nung pam-basketbol at yung pamasok sa eskuwela. gusto ko kulay brown na natuluan ng pintura. gusto ko yung walang alikabok galing sa kabinet mo. gusto ko yung madaming lugar na ang napuntahan. mas mainam siguro yung nakaapak ng simbahan. paheram ng sapatos, siyempre dapat kasya saken. ayoko ng bigay, gusto ko hiram lang.

kahit may alipunga ka pa o kahit ano pa'ng sakit sa paa, ayos lang. kahit ngumanganga na at lumalawit na ang dila, mas mainam. kahit hindi mo napapahiran ng Kiwi o nalalabhan, wala ako'ng pakealam. di ko naman isusuot e, isusukat ko lang. pahiram po.

maraming lakad, maraming lakbay at maraming tuklas. isang mainam na sapatos kapareha ng medyas na butas. para sa mga paa na madumi't sugatan. para sa kaluluwang hindi nasisikatan ng araw. para sa nilalang na hindi nakararamdam. para sa mga buto at balat na pinakuan. paheram ng sapatos.

paheram ng sapatos. ayoko nung may air soul, laos na yun. ayoko din nung kay Penny Hardaway. kahit blue pa ang kulay nun, ayaw. gusto ko lang naman, yung madalas maglakad, maglakbay at magtuklas.

tss.