Ang Sugat ay Istiker

at ang malakas na istiker pag dinikit mo sa balat, nakasusugat.

pag mahilig ka sa indian manggo, siguro madalas ka magkasugat. kung nakaka-sincuenta piraso ka nito sa loob ng isang araw o higit pa, bukod sa hiwa ng kutsilyo sa daliri, sa kubeta ka titira. hindi ito tungkol ulit sa jebs, huwag mag-alala.

lahat ng bagay na may buhay nasusugatan. hindi lang tao, pati hayop, puno, halaman at kung ano pa man. tama. may kasabihan nga, "Lahat ng nabuhay, mamamatay.", pero, 'di lahat ng mamamatay may sugat. ibig sabihin, hindi nakamamatay ang sugat. puwera na lang kung 'di mo gagamutin? paano kung may kalawang yung nakasugat sa'yo? paano kung may rabbies yung kumagat sa'yong aso? paano kung napagkamalan mong bandaid yung istiker na super adhesive? patay.

maganda din nga minsan 'pag nasugatan tayo. natututo tayo. nalalaman natin na hindi pinaglalaruan ang Gilette. na ang gunting, nakapuputol din ng balat. na ang bubog, hindi kinakain, hindi inaapakan. matututunan din natin na masarap pala tuklapin ang langib at idikit sa noo.

madali lunasan ang sugat. parang istiker lang ba? natatanggal 'to sa balat natin o di kaya'y sa kaluluwa? mahirap tanggalin lalo na kung matagal ng nakadikit kaya ang mabuti, 'pag bagong dikit pa lang ang sugat, tanggalin mo agad at ihanap ng magandang lugar na pagdidikitan. sarap sa pakiramdam talaga na tuklapin ang istiker na sugat. dahan-dahan lang ha? huwag biglaan. hindi ka naman nagtatanggal ng buhok sa katawan. basta, sa unang tanggal mo lang masakit yan. sa susunod, medyo mild na. ulitin lang ng ulitin ang proseso. dikit sa ibang lugar, tanggal, dikit ulit, tanggal, diki, tangga, iki, angga, ik, angg, i, ngg, ng, g. *poof* wala na. hindi na didikit pang muli ang sugat mong parang istiker lang pala. simple. kailangan mo lang, lugar na mapagkakatiwalaan dikitan at kayang tiisin ang sakit na dulot ng pagtanggal ng istiker na sugat na madikit.

pagtapos nun, magpakasaya na kayo magtanggal ng langib. solid!