Para sa Isnatser

hindi ako galit.

nagpapasalamat pa. pinaramdam mo sa akin kung gaano ako kainutil. yung imahe ng ina ko na humahagulgol, habang buhay na uukit sa kokote ko. tuwing maaalala ko to, gigising ako at sasabihin na hindi ko na siya puwede makita muli sa ganoong estado.

salamat dahil nakauwi siya ng buo. walang galos. yung trauma na binigay mo sa kanya, yun na ata yung pinakamasakit. sana ipagdasal mo na mawala agad. sana pumasok sa isipan mo yun. pero salamat pa din dahil, yun nga, buhay siya, hinablot mo lang ang purse niya at tumakbo nang matiwasay. buti hindi mo kinuha pati yung bitbit niyang groseri kundi, wala kami kakainin. pero 'di din naman kami nakakain eh.

yung lumang modelo na selphone na may scotch tape, gumagana pa. huwag mo itapon sana. malaki silbi niyan kahit luma na. yung pera gamitin niyo po sana sa marangal na paraan. malaking halaga din yun, makatulong po sana talaga. gamitin niyo po sana sa tamang paraan. matutuwa po ako talaga kung para yan sa pagkain o pambayad sa ospital para sa may sakit mong anak o ano pa man. sana gipit ka lang talaga. sana di mo yan gamitin para sa bisyo mo lang. sana makatulong talaga sa'yo yan para di ka na ulit makagawa ng masama. sana talaga 'di mo na ulitin pa.

tuwing kinukuwento ka ng inay ko, nadudurog ako. nakita ko kung paano niya pinaghirapan yun. lagi siyang puyat. kumukulo ang utak kaiisip kung paano mapapagkasya sa mga bayarin. sa isang iglap lang, nakuha mo. nakagigigil oo. pero ano pa ba ang magagawa ko. nangyari na eh. walang saysay ang mapoot pa sa'yo.

alam niyo po, salamat talaga dahil kayo ang nang-isnats sa ina ko. hindi kasi kayo gumamit ng armas o dahas. yung iba nasasaksak, binabaril, ginugulpi, pero kayo hindi ganun. basta po, tulad nung sabi ko, sa tamang paraan niyo sana gamitin ang pera. huwag kang mag-alala, ako na mag-aabogado para sa'yo sa nanay ko para di na siya magalit pa. pinapatawad na kita.

mag-ingat po kayo parati. huli na sana 'to.